RADIO CLASH-EN GAUR… (VII)

            Gabon entzule!

            Ondo dakit saio hau entzuten duen oro oraindik gerria mugitzeko sasoian dagoela…

            Altxa, bada! Altxa bateriaren kolpearekin batera. Zer egiten duzu oraindik aulkian eserita? Altxa, altxa, altxa!

            Altxa! Izan ere, uhinen bestaldean dagoen zure lagun honek, belarrira hitz egiten dizun honek, dantzara gonbidatzen zaituen honek, beti bezala, betiko orduan, rock´n´roll onena eskaintzen dizun berberak ere, horixe egingo baitu berehala.

            Altxa eta astindu gerri hori, hasi da-eta gaurko saioa! Zuretzat, entzule, Little green bag! Dantza, dantza, dantza!

RADIO CLASH-EN GAUR… (VI)

            Gabon entzule!

            Berriz ere irratia entzuten harrapatu haut...

            Zoriontsuak, eguraldi zatar honekin, etxeko aterpean zaudetenak, prekupazioak leihoaren bestaldean bustitzen ikusten dituzuenak!

            Nire besarkada lanean zaudetenentzako da, edota barku bihurtu berri den autoan eurijasa zeharkatzen duten marinel ausartentzat.

            Bai, itzuli naiz! Uhinen bestaldeko laguna nauzu, belarrira hitz egingo dizuna, dantzara gonbidatuko zaituena. Beti bezala, betiko orduan, rock´n´roll onenarekin.

            Gaur, saioarekin hasteko, zuretzat entzule, The Fleshtones-en Up-Front maketatik hartutako kanta bat aukeratu dut, Theme from “The Vindicators”.

            Egurra kitar horri! Yeaah! Yeaah! Ongi etorri!

RADIO CLASH-EN GAUR… (V)

            Gabon entzule!

            Ihesean dauden horientzat guztientzat. Kartzela, aberria, familia, eskola, lagunak, bikotea edota lana betirako uztea erabaki eta lortu zuten horientzat guztientzat.

            Etxeko atea kaleko aldetik itxi eta euritara maleta batekin atera ziren horientzat, berriro ez itzultzeko asmo irmoarekin. Seme-alabak, hauek lotan zeuden bitartean, muxu emanda agurtu zituenarentzako.

            Zuretzat, entzule. Oroit ezazu: beti izango duzu lagun bat, hemen, uhinen bestaldean, belarrira hitz egingo dizuna, dantzara gonbidatuko zaituena. Beti bezala, betiko orduan, rock´n´roll onenarekin.

            Zuretzat, saioarekin hasteko, Del Shannon-en Runaway! Eutsi gogor eta ongi etorri!

RADIO CLASH-EN GAUR… (IV)

            Gabon entzule!

            Aska zaitez!

            Nagusia putakume galanta dela?

            Egiten duzuna ez zaizula batere gustatzen?

            Lankideak, lagunak baino, zakur amorratuak direla?

            Kokoteraino zaudela goizeko seietan jaiki beharraz?

            Txo, harritzekoa kontrakoa litzateke! Aska zaitez, utzi lana, utzizazu derrepentean!

            Eta jakinzazu: beti izango duzu lagun bat, hemen, uhinen bestaldean, belarrira hitz egingo dizuna, dantzara gonbidatuko zaituena. Beti bezala, betiko orduan, rock´n´roll onenarekin.

            Gaur, saioarekin hasteko, zuretzat entzule, Lee Dorsey-en Working on a coalmine! Animo eta ongi etorri!

RADIO CLASH-EN GAUR… (III)

             Gabon entzule!

            Nork ez du oroitzen umeetako uda garai hura? Bueltatzeko ordua iristen zeneko momentua, adibidez. Hori izaten zen gogorrena: nebarrebekin gurasoek topera kargatu zuten autoaren atzealdean sartzen zinenean eta aitak autoa arrankatzen zuenean. Baina gogoratzen, eserlekuan belauniko jarrita atzera begiratzen zenuenean, udalagun guztiak autoaren atzetik agur esaten nola egiten zuten korri eta garrasi, aitak abiadura azkartzea beste erremediorik ez zuen arte?

            Bai, bai, bai! Hemen nauzu gaur ere, uhinen bestaldean, studioan, bakarrik; belarrira hitz egingo dizun hori naiz, dantzara gonbidatuko zaituena. Beti bezala, betiko orduan, rock´n´roll onenarekin.

            Asmatuko zenuen agian: hondartzako mutil horiek, The Beach Boys-ek, zabalduko dute gaurko saioa: zuretzat, entzule, zuzen-zuzenean, All summer long! Ongi etorri!

RADIO CLASH (II)

Gabon entzule!

            

Maite zenuen horrek laga zintuela?

            Ateari izugarrizko danbatekoa emanda alde egin zuela?

            Zure telefono deiei ez die jaramonik egiten; badakit, ulertzen dut. Baina nork esan du galduta dagoenik dena? Ez dagoela zereginik?

            Bai zera! Jakinzazu: beti izango duzu lagun bat, hemen, uhinen bestaldean, belarrira hitz egingo dizuna, dantzara gonbidatuko zaituena. Beti bezala, betiko orduan, rock´n´roll onenarekin.

            Eta gaur, hasteko, umore beltz dosi txiki bat emango diegu bihotza mila zatitan duten horiei, ezta? Ea zer deritzozuen Buddy Holly-ren maisulan honi. Zuretzat entzule, saioarekin hasteko, That´ll be the day! Astindu gerri hori! Ongi etorri!

RADIO CLASH (I)

            Gabon entzule!

             

Etxean bakarrik harrapatu al zaitugu, isiltasuna pisuegia egiten zitzaizun momentu horietako batean?

            Ohea hotzegia suertatzen zaizulako ote?

            Maite zaituztenak urrutiegi dituzulako, agian?

            Ba jakinzazu: beti izango duzu lagun bat, hemen, uhinen bestaldean, belarrira hitz egingo dizuna, dantzara gonbidatuko zaituena. Beti bezala, betiko orduan,  rock´n´roll onenarekin.

            Gaur, saioarekin hasteko, zuretzat entzule, Flash Cadillac & The Continental Kids-en At the top!

            C´mon, let´s go to the hop! Ongi etorri!